Jiang Xueqin : चीनच्या नॉस्ट्राडॅमसने सांगितले ट्रम्पचे भविष्य

अमेरिका-इराण युद्धामध्ये पंधरा दिवसांचा विराम आला आहे. यात चीनची भूमिका असल्याची माहिती आहे. मात्र याच चीनमधील एका भविष्यवक्त्याचे नावही चर्चेत आले आहे. या चीनच्या नॉस्ट्राडॅमसने इराण युद्धाची भविष्यवाणी आधीच केली होती. सोबतच हे युद्ध संपल्यावर अमेरिकेचे राष्ट्राध्यक्ष डोनाल्ड ट्रम्प यांच्याभोवती अडचणींचा फास अधिक घट्ट होणार असल्याचेही सांगितले होते. चीनचे नॉस्ट्राडॅमस म्हणून जियांग शुएकिन यांचे नाव घेतले जाते. जियांग यांनी अमेरिका-इराण युद्धाची भविष्यवाणी आणि दोन्ही देशांमधील दोन आठवड्यांच्या युद्धविरामाचीही भविष्यवाणी केली होती. या दोन्हीही भविष्यवाण्या सत्यात उतरल्यावर आता त्यांची तिसरी भविष्यवाणी चर्चेत आहे. यात त्यांनी डोनाल्ड ट्रम्प यांना भविष्यात आव्हानात्मक परिस्थिती राहणार असून, त्यांच्या खुर्चीलाही धोका असल्याचे सांगितले आहे. ( Jiang Xueqin )

चीनचे नॉस्ट्राडॅमस म्हणून जियांग शुएकिन यांना ओळखले जाते. जियांग यांनी फार पूर्वीच अमेरिका आणि इराण यांच्यात महाविनाशकारी युद्ध होणार, असे भाकीत केले होते. जियांग शुएकिन यांनी २०२४ साठी तीन प्रमुख भाकिते केली होती. त्यांचे पहिले भाकीत होते की, ट्रम्प अमेरिकेची अध्यक्षीय निवडणूक जिंकतील. त्यांचे दुसरे भाकीत होते की, अमेरिका इराणविरुद्ध युद्धभूमीवर उतरेल. तर तिसरे भाकीत होते की, अमेरिका इराणसोबतचे युद्ध हरेल आणि यामुळे जागतिक व्यवस्था कायमची बदलेल. जियांग यांनी या युद्धाचे फक्त भाकीत केले नव्हते, तर युद्धात कोणाची बाजू सरस ठरेल हेही सांगितले होते. जियांग यांनी तेव्हाच इराणविरुद्धच्या युद्धात अमेरिकेला संघर्ष करावा लागू शकतो, हे सांगितले होते. मात्र अमेरिकेचा महासत्तेचा दर्जा पाहून जियांग यांना या भविष्यावरून ट्रोल करण्यात आले होते. अमेरिकेला इराणसारखा देश हरवू शकत नाही. उलट इराण अमेरिकेसमोर फार दिवस उभा राहू शकणार नाही, असेही काहींनी सांगितले होते. मात्र जियांग शुएकिन आपल्या भविष्यावर ठाम राहिले. आता अमेरिका-इराण युद्ध सुरू झाल्यावर चाळीस दिवसानंतरही इराणचे पारडे जड होते, हे उघड आहे. त्यावरून जियांग यांची ही भविष्यवाणी सत्यात उतरल्याचे स्पष्ट झाले आहे. यामुळेच जियांग शुएकिन यांनी सांगितल्याप्रमाणे अमेरिकेचे राष्ट्राध्यक्ष डोनाल्ड ट्रम्प अधिक वादात अडकणार असून त्यांची खुर्चीही जाणार का, अशी उत्सुकता अनेकांना आहे.

अमेरिका-इराण युद्धाबाबत जियांग यांनी सविस्तर भविष्य सांगितले आहे. त्यात जियांग शुएकिन यांनी असेही म्हटले आहे की, अमेरिका अनिच्छेने का होईना, इराणमध्ये जमिनीवरील कारवाईसाठी आपले सैन्य पाठवू शकते. माध्यमांच्या वृत्तानुसार, इस्लामाबाद येथे होणारी शांतता वार्ता अयशस्वी ठरली तर ट्रम्प प्रशासन इराणचे समृद्ध युरेनियम सुरक्षित करण्यासाठी विशेष दले पाठवण्याचा निर्णय घेऊ शकते. जियांग शुएकिन ‘प्रेडिक्टिव्ह हिस्ट्री’ नावाचे यूट्यूब चॅनल चालवतात, जिथे ते आपली भाकिते आणि विचार मांडतात. जियांग बीजिंगमध्ये तत्त्वज्ञान आणि इतिहास शिकवतात. येल कॉलेजचे पदवीधर असलेल्या जियांग यांनी चीनमधील शिक्षण सुधारणा आणि अभ्यासक्रम विकासावर लक्ष केंद्रित केले आहे. त्यासोबत ते भाकितेही सांगतात. त्यांच्या या अचूक भाकितांमुळेच त्यांना ‘चीनचा नॉस्ट्राडॅमस’ हे टोपणनाव मिळाले आहे. शैक्षणिक क्षेत्रापलीकडे, जियांग यांनी त्यांच्या ‘प्रेडिक्टिव्ह हिस्ट्री’ या यूट्यूब चॅनलद्वारे मोठी लोकप्रियता मिळवली आहे. यामध्ये जियांग वारंवार घडणारे भूकंप आणि राजकीय घटना याबाबत आपल्या प्रेक्षकांना माहिती देत असतात. ( Jiang Xueqin )

=======

हे देखील वाचा : Donald Trump Ceasefire : ट्रम्पच्या पलटीमागचं सत्य

=======

जियांग हे ‘सायकोहिस्ट्री’ या संकल्पनेवर आधारित भाकिते व्यक्त करतात. ही एक काल्पनिक विज्ञान शाखा असून लेखक आयझॅक असिमोव्ह यांनी ‘फाउंडेशन’ मालिकेत तिची संकल्पना मांडली आहे. ही शाखा भविष्याचा अंदाज लावण्यासाठी दीर्घकालीन ऐतिहासिक प्रवाहांचा वापर करते. त्यांच्या या सायकोहिस्ट्री संकल्पनेवर त्यांनी ट्रम्प यांच्यासंदर्भात जी भाकिते व्यक्त केली, तेव्हा खूप टीका झाली होती. तेव्हा जियांग यांनी अमेरिका-इराण या युद्धात इराणला फायदा होऊ शकतो, कारण इराणी लोक गेल्या २० वर्षांपासून या संघर्षाची तयारी करत असल्याचे सांगितले होते. त्यांनी हे भाकीत सांगितल्यावर त्यांची खिल्ली उडवण्यात आली. मात्र युद्ध सुरू झाल्यावर हे भाकीत प्रत्यक्षात उतरले आहे. आता जियांग यांनी हे युद्ध दीर्घकाळ चालेल आणि जेव्हा ते अखेरीस संपेल, तेव्हा जग पूर्वीसारखे राहणार नाही, असे नवे भाकीत केले आहे. त्यामुळे या युद्धाच्या परिणामाच्या कल्पनेने आता भीती व्यक्त होत आहे. ( Jiang Xueqin )

सई बने…