Skin Care : नाकावरील ब्लॅकहेड्स आणि व्हाइटहेड्स यामुळे सौंदर्य बिघडले जाते. त्वचेतील लहान छिद्रांमध्ये (पोअर्स) धूळ, घाम, सिबम आणि डेड स्किन जमा होते, तेव्हा ब्लॅकहेड्स व व्हाइटहेड्स तयार होतात. विशेषतः नाकावरील त्वचा तेलकट असल्यामुळे या भागात ही समस्या अधिक दिसून येते. बाजारात अनेक स्क्रब्स, स्ट्रिप्स आणि क्रीम्स मिळतात, पण त्यांचा उपयोग कमी कालावधीसाठीच होतो. त्यापेक्षा काही सोपे आणि प्रभावी घरगुती उपाय नियमित वापरल्यास हा त्रास कमी होतो.
सर्वप्रथम, त्वचा स्वच्छ ठेवणे खूप गरजेचे आहे. रोज सकाळी आणि रात्री चेहरा सौम्य फेसवॉशने धुणे आवश्यक आहे. विशेषतः ऑइल-फ्री क्लिंजर वापरल्यास त्वचेतील अतिरिक्त तेल काढून टाकले जाते. त्यानंतर आठवड्यातून दोनदा स्क्रबिंग करणे गरजेचे असते. यासाठी आपण साखर आणि मधाचा स्क्रब तयार करू शकतो. एक चमचा साखर, अर्धा चमचा मध आणि काही थेंब लिंबाचा रस एकत्र करून हलक्या हाताने नाकावर फिरवा. साखर डेड स्किम काढून टाकते, मध त्वचेला ओलावा देते आणि लिंबू त्वचेतील अतिरिक्त तेल कमी करते.
त्याचप्रमाणे, बेसन आणि दूधाचा लेप ब्लॅकहेड्ससाठी प्रभावी उपाय आहे. एक चमचा बेसनात दूध मिसळून पेस्ट तयार करा आणि नाकावर लावा. १० ते १५ मिनिटांनी कोरडे झाल्यावर सौम्यपणे घासून काढा. हे उपाय त्वचा खोलवरून स्वच्छ करून ब्लॅकहेड्स कमी करतात. व्हाइटहेड्ससाठी स्टीमिंग हा अतिशय उपयुक्त उपाय आहे. एका मोठ्या भांड्यात गरम पाणी घेऊन चेहरा त्यावर ठेवून ५ ते १० मिनिटे वाफ घ्या. वाफेमुळे त्वचेतील छिद्रे उघडतात आणि व्हाइटहेड्स सहजपणे बाहेर येतात. स्टीमनंतर टॉवेलने चेहरा हलक्या हाताने पुसून थंड पाण्याने धुवा. ह्या पद्धतीमुळे त्वचा ताजीतवानी वाटते.(Skin Care)
=========
हे ही वाचा :
कांजीवरम आणि बनारसी साडीमधील फरक माहितेय का?
पावसाळ्यात कोरड्या केसांसाठी कोणते हेअर मास्क लावावेत?
=========
एलोवेरा जेल देखील उत्तम घरगुती उपाय आहे. एलोवेरा जेल थेट नाकावर लावल्यास ते त्वचेला थंडावा देते, जळजळ कमी करते आणि छिद्रे बंद करून ब्लॅकहेड्स/व्हाइटहेड्सपासून संरक्षण करते. त्याचप्रमाणे, बेकिंग सोडा हा एक नैसर्गिक एक्स्फोलिएंट आहे. एक चमचा बेकिंग सोड्यात थोडेसे पाणी घालून पेस्ट तयार करा आणि नाकावर लावा. ५ ते ७ मिनिटांनी चेहरा धुवा. हा उपाय आठवड्यातून एकदाच करावा, कारण तो जास्त वापरल्यास त्वचा कोरडी होऊ शकते.
घरगुती उपायांसोबतच योग्य आहार आणि पाणी पिण्याची सवयही महत्वाची आहे. तेलकट आणि तळलेले पदार्थ कमी खाल्ल्यास त्वचेतील तेलाचे प्रमाण संतुलित राहते. रोज कमीत कमी ८ ते १० ग्लास पाणी पिल्यास त्वचा स्वच्छ राहते. यासोबतच झोप पुरेशी घेणे आणि ताण-तणाव टाळणे देखील आवश्यक आहे.
